Yanga noma, yaibwaga Simba vita ya Ngassa

Ngassa  

In Summary

Iwapo suala la Ngassa litashindikana kuamriwa kisheria, ina maana kuwa wajumbe wa kamati hiyo watapiga kura na hiyo itaifanya Yanga kuibuka kidedea kwani ina wajumbe wanne dhidi ya watatu wa Simba.

KAMATI ya Sheria na Hadhi za Wachezaji ya Shirikisho la Soka Tanzania (TFF) inakutana kwa siku mbili kuanzia kesho Jumatano kujadili utata na pingamizi za usajili wa wachezaji wa Ligi Kuu Bara, lakini Yanga inaonekana kuwa na faida zaidi kuliko Simba kuhusu suala la Mrisho Ngassa.

Kamati ya Sheria na Hadhi za Wachezaji ya TFF inaundwa na wajumbe saba na hao ndio watakaoamua uhalali wa Ngassa pamoja na wachezaji wengine waliowekewa pingamizi.

Wajumbe saba wanaounda kamati hiyo ni pamoja na Mwenyekiti; Alex Mgongolwa, Makamu Mwenyekiti; Hussein Mwamba pamoja na wajumbe; Llyod Nchunga, Imani Madega, Ismail Aden Rage, Omari Gumbo na Venance Mwamoto.

Hata hivyo, katika kamati hiyo, wajumbe wanne ni wapenzi wa Yanga na wajumbe watatu ni wapenzi wa Simba, hivyo iwapo suala la Ngassa likifikia hatua ya kupiga kura ni dhahiri kuwa Yanga itashinda kutokana na kuwa na wajumbe wengi katika kamati hiyo.

Wajumbe ambao ni wapenzi wa Yanga ni Mgongolwa, Madega, Nchunga na Mwamoto.

Simba itakuwa na wajumbe watatu tu; Rage, Gumbo na Mwamba.

Iwapo suala la Ngassa litashindikana kuamriwa kisheria, ina maana kuwa wajumbe wa kamati hiyo watapiga kura na hiyo itaifanya Yanga kuibuka kidedea kwani ina wajumbe wanne dhidi ya watatu wa Simba.

Lakini faida nyingine ya Yanga katika kikao hicho ni kwamba itakuwa na wanasheria watatu wakati Simba haina mwanasheria hata moja.

Wanasheria hao ni Mgongolwa, Madega na Nchunga ambao wanaweza kutumia vifungu kadhaa kuimaliza kesi hiyo ya Ngassa kirahisi.

Hata hivyo, kamati za TFF hutumia kanuni na sheria za soka katika kuamua mambo hayo, hivyo suala la upenzi wa timu linaweza lisiwe na nguvu yoyote.

Kamati hiyo msimu uliopita iliwaidhinisha Mbuyu Twite na Kelvin Yondani kuchezea Yanga baada ya kubaini kuwa mikataba waliyosaini Simba ilikuwa na utata.

Ngassa alisaini mkataba wa mwaka moja akiwa kwa mkopo Simba akitokea Azam, kabla ya Yanga kumsainisha mkataba wa miaka miwili.