CCM watoa ufafanuzi kuhusu mawaziri mizigo

Katibu wa Itikadi na Uenezi waCchama Cha Mapinduzi (CCM), Nape Nnauye 

Katika mabadiliko hayo, Rais aliwateua mawaziri wapya 10 na kuwapandisha manaibu wanne kuwa mawaziri kamili.


Chama Cha Mapinduzi (CCM), kimesema leo kitatoa ufafanuzi kuhusu mawaziri walioshindwa kutekeleza majukumu yao lakini hawajaguswa, licha ya Rais Jakaya Kikwete kufanya mabadiliko ya Baraza la Mawaziri na kuwatosa mawaziri watano.

Katika mabadiliko hayo, Rais aliwateua mawaziri wapya 10 na kuwapandisha manaibu wanne kuwa mawaziri kamili.

Katibu wa Itikadi na Uenezi wa chama hicho, Nape Nnauye, aliliambia gazeti hili jana kuwa kumekuwa na kauli tata zinazotolewa na watu wa kada mbalimbali kuhusu kubaki kwa mawaziri hao.

“Kesho (leo) nitatoa ufafanuzi kuhusu mawaziri hao maana kumekuwa na kauli tata na nyingine za ajabu kabisa kuhusu mawaziri hao,” alisema Nape.

Desemba 14 mwaka jana, CCM kupitia kikao chake cha Kamati Kuu ya Halmashauri Kuu ya Taifa, ilimtupia mpira Rais Kikwete kuamua hatma ya mawaziri hao, huku kikifafanua kuwa ilimshauri ama kuwafukuza, kuwahamisha wizara au kuwahimiza wafanye kazi.

Mawaziri hao ni, Waziri wa Elimu na Mafunzo ya Ufundi, Dk Shukuru Kawambwa, Waziri wa Kilimo, Chakula na Ushirika, Christopher Chiza, Naibu Waziri wa Fedha Saada Mkuya (alihojiwa kwa niaba ya aliyekuwa Waziri wa Fedha, Dk William Mgimwa ambaye kwa sasa ni marehemu).

Wengine ni, Waziri wa Viwanda na Biashara, Dk Abdallah Kigoda, Waziri wa Maendeleo ya Mifugo na Uvuvi, Dk Mathayo David, Waziri wa Nchi katika Ofisi ya Rais, Menejimenti ya Utumishi wa Umma, Celina Kombani na Waziri wa Nchi katika Ofisi ya Waziri Mkuu, Tawala za Mikoa na Serikali za Mitaa (Tamisemi), Hawa Ghasia.

Katika ufafanuzi wake wa jana, Nape alisema CCM ilivyowataja mawaziri hao ilitoa mapendekezo mengi na kwamba vyombo vya habari vimekuwa vikiripoti habari tofauti na kilichozungumzwa na chama hicho.

Mawaziri hao waliotajwa kuwa ‘mzigo’ waliitwa na kuhojiwa katika kikao cha Kamati Kuu ya chama hicho na kutakiwa kutoa maelezo ya masuala yaliyoibuliwa na wananchi wakati wa ziara ya viongozi wa CCM wilayani Namtumbo mkoani Ruvuma.

Tofauti na ilivyotarajiwa na wengi, kati ya mawaziri hao wanaotajwa kuwa ni ‘mzigo’ hakuna hata mmoja aliyeguswa.

Badala yake walioondolewa katika mabadiliko hayo ni Waziri wa Nchi, Ofisi ya Makamu wa Rais (Mazingira), Dk Terezya Huvisa.

Wengine ni Goodlucky Ole Medeye (Ardhi), Gregory Teu (Viwanda na Biashara), Benedict Ole Nangoro (Maendeleo ya Mifugo na Uvuvi) na Philipo Mulugo (Elimu na Mafunzo ya Ufundi).