SAIKOLOJIA&UTAFITI: Waajiriwa wengi hufa maskini, tafakari ndugu

Ambacho nataka kusisitiza ni kwamba haijalishi uko katika hali gani ya maisha, unaweza kuondoka katika hali hiyo ngumu na kuwa na maisha bora. Hata kama uko mdogo kimafanikio kiasi gani, fahamu kuwa hata mbuyu ulianza kama mchicha.

Karibu ndugu yangu katika safu hii ambayo imekuwa ni msaada hasa kwa watu wenye ndoto za kubadilika katika maisha.

Ambacho nataka kusisitiza ni kwamba haijalishi uko katika hali gani ya maisha, unaweza kuondoka katika hali hiyo ngumu na kuwa na maisha bora. Hata kama uko mdogo kimafanikio kiasi gani, fahamu kuwa hata mbuyu ulianza kama mchicha. Ni kawaida yetu wanadamu kuanza wadogo kisha kuwa wakubwa, kwa maana hata kuzaliwa tunazaliwa tukiwa wadogo, polepole tunakua hatimaye tunakuwa watu wazima.

Lakini hata unapokuwa mkubwa kwa maana ya mafanikio kuna wakati unaweza kupigwa...yawezekana ni madeni, yawezekana ni fitina umefanyiwa, ukafukuzwa kazi na kadhalika, lakini ni makosa kukata tamaa. Unapaswa kuangalia wapi ulipojikwaa, ili uweze kwenda mbele bila kujikwaa tena.

Haijalishi wewe hapo ulipo una cheo gani, ni suala la msingi sana kuyatengeneza maisha yako kuwa katika hali ya kujitegemea.

Wachumi maarufu Duniani wanabainisha kuwa ulimwengu unaendeshwa na watu wasiozidi asilimia 10, hao ndio waliobuni gazeti unalolisoma, waliobuni karatasi, magari tunayopanda, pikipiki, taa na kadhalika, huku wengine tukiwa ni wanunuzi wa huduma au ugunduzi wao.

Wanasema kwamba wengi wa watu ni waoga wa kujaribu, huku wengi wao wanachokifahamu ni kula starehe kuliko kuangalia namna ya kujiimarisha kiuchumi.

Katika kitabu the Law of Success (Sheria za kufanikiwa) cha mwandishi nguri Duniani, Napoleon Hill, ni kwamba msingi mkubwa wa kufanikiwa kwa mtu kwanza kabisa ni kuwa na nafsi ya kuthubutu kufanya jambo.

Anasema kwamba mtu akiwa na fikra hizo na akazifanyia kazi, kwa vitendo, kufanikiwa si jambo gumu kwake.

Katika kitabu cha  Mwongozo wa Kutengeneza bidhaa mbalimbali zikiwemo keki, vyakula vya kuku, sabuni na bidhaa zingine zinazoweza kumsaidia mtu kuanzisha biashara yake, nilieleza pia jambo kama hili, kwamba mtu yeyote anaweza kuwa na maisha yenye mafanikio kama pia atakuwa anafanya kazi nyingi.

Ni sawa umeajiriwa lakini wangapi walikuwa na ajira leo wanalia, wengine walikuwa mawaziri, leo wamepunguzwa, wako nyumbani wanalia, wengine walikuwa wakuu wa mikoa, wakuu wa polisi na kadhalika. Lakini ukiwa na mradi wako imara, hata kama utafukuzwa kazi, huwezi kulia sana. Hata kama utaumwa unaweza kuajiri watu kuendesha mradi wako, lakini kwenye ajira, ukiumwa sana, mwajiri anayo haki ya kukuondoa kazini.

Tatizo kubwa la wengi ni kwamba hawafanya yale yaliyo ya maana, unakuta mtu anatoka kazini anaingia kwenye ulevi, anahonga au matumizi mengine yasiyo ya maana; si wengi wanaowaza namna ya kufanya ili wawe na miradi yao imara.Ni sawa unaweza kuringia ajira, unaweza kuringia ubosi, kumbuka kiti unachokalia, kuna watu walikikalia, iko siku na wewe utatoka, je, umejiandaaje kama ikitokea unafukuzwa kazi? Tafakari, chukua hatua.

Ni suala la msingi sana familia kuwa na mradi wao, ni ujinga kwa mfano watu wameoana halafu kila mtu anawaza namna ya kujenga kwao au kujenga kwa siri; hekima ni kwa watu wa familia kujadiliana namna ya wao wenyewe kuwa na mradi fulani wa maendeleo kwa pamoja, ili hatima ya uzee wao iwe nzuri.

 Watu wengi wanakufa haraka baada ya kustaafu kwa sababu wanakuwa hawana fedha za kuendesha gharama mbalimbali za maisha; je, kama unafukuzwa leo hapo kazini unaweza kuishi miezi mitatu bila kuteteleka? Kama unaweza wewe ni mtu imara unayefaa, kama huwezi hilo ni kosa kubwa, jipanga haraka kuimarisha uchumi wako.