SAIKOLOJIA&UTAFITI: Wanawake wanapolaumiwa kwa kuwatesa wanaume

Imezoeleka kusikia kwamba wanawake ndio wanaonyanyaswa; sasa taarifa mpya ni kwamba idadi ya wanaume wanaonyanyaswa na wanawake nchini inaongezeka.

Jambo la msingi ambalo ningependa lifahamike ni kwamba kitendo cha unyanyasaji si kizuri iwe amefanyiwa mwanamke au mwanamume. Ukweli ni kwamba kila mtu anapaswa kufikiria namna ya kumfanyia jambo zuri mtu mwingine, kwani ubaya  hauna maana.

Ni kama zamu ya wanaume kuteswa

Baada ya kelele za muda mrefu kwamba wanaume wanawatesa wanawake kwa kuwapiga, kuwanyanyasa kwa kauli na matendo yao mengine, taarifa za hivi karibuni zinaonyesha kuwa kasi ya wanaume kunyanyaswa na wanawake na hata kuteswa inaongezeka.

Wanaume kwa sasa wanateswa kwa sababu nyingi, kwa mfano wengine wako kwenye ndoa lakini hawana uhakika wa ‘ndoa’; hawana sauti, wakiongea sana wanaambiwa aaah bwana eeeh usinisumbue...jana nilikupa na leo unataka kwani mimi ni gogo au ng’ombe sichoki”.

Baadhi ya wanawake wamekuwa hawana kauli nzuri, hawana ile hali ya kushuka ili kuruhusu mazungumzo thabiti kufanyika kunapotokea jambo. Je, tunakwenda wapi katika hali kama hii?

Kijamii inafahamika kwamba kazi za aina fulani ni za watu wa jinsi fulani na hizi za jinsi ya fulani, lakini kwa namna tunavyoona mambo ni kwamba wapo wenye kulazimisha kazi ambazo ni maalumu kwa wanawake zifanywe na wanaume.

Mishahara ya wanawake wengi haijulikani inatumikaje, mwanaume akihoji huwa ni ugomvi. Ninachotaka kusema hapa ni kwamba iko haja kwa Watanzania kila mtu kwa nafasi yake aangalie namna anavyoishi na kurekebisha kasoro ili Taifa letu liweze kuendelea vema.

Kuwa na uhusiano mbaya ni hatari kwa ustawi wa nchi kwa jumla, kila mtu awe chanzo cha mabadiliko ambayo anataka kuyaona.Je, unayofanya kwa mwenzi wako au watu wengine ungependa kufanyiwa? Hili ndilo la kujiuliza na kulifanyia kazi.

Matendo ya wanaume wengine ni kinyaa

Mwanaume ni kichwa, hii ni kwa mujibu wa vitabu vyote vitakatifu, kwa maana hiyo wanapaswa kuwa kweli vichwa kwa kauli na matendo yao.Kichwa kinapofanya mambo ya bangibangi, ni ngumu sana ubavu (mke) kuwa na moyo thabiti wa kuendesha maisha au uhusiano wao.

Ingawa wapo wanawake wenye matendo ya kunuka, kwa lolote ambalo linatokea ni vizuri kupata muda wa kuzungumza ili kuondoa tofauti.

Kulalamika kwamba wanawake ndio watu wabaya siku hizi au wanaume ni watu wabaya, haina maana, kilicho cha maana ni kuangalia namna gani tunaweza kuondoa kasoro ili maisha yaweze kwenda.

Kwa hali ilivyo sasa kila kundi linamlalamikia mwenzake, wanawake wengi wanawalaume kwamba wengi hawana utulivu, huku wanaume nao wanasema kwamba wanawake wengi siku hizi ni ‘chenga’ yaani hawaeleweki.

Hakuna sababu kwa wanawake kulipiza kisasi kwa kuwatendea mabaya wanaume, labda kwa sababu wamewahi kuwatendea mabaya, wala hakuna sababu kwa yeyote kufanya hivyo. Kilicho cha msingi ni kila mmoja kujiona kwamba analo deni la kumtendea haki mwenzi wake au jamii inayomzunguka.

Imani yangu ni kwamba kila mtu akiwa na moyo wa kupendana kwa dhati na kuamini tunalo deni la kufanyiana mazuri, Tanzania itakuwa na maendeleo kwa kasi. Vitendo vya kutendea mabaya, huenda havitakuwepo tena, hivyo kufanya kila mtu, wakiwemo watoto wetu watayafurahia maisha. Duniani tunapita, ya nini kutesana!