Ushindi Sombetini waibua shangwe

Arusha.

  Mamia ya wafuasi wa Chadema jana, waliandamana katikati ya jiji, wakati mvua ikinyesha wakimtembeza Diwani mpya wa Kata ya Sombetini, Ally Benanga huku, viongozi wakitoa kauli kuwa siku za Meya wa Jiji la Arusha, Gaudence Lymo kukaa madarakani zinahesabika.

Mamia ya wafuasi hao, wakiongozwa na mbunge wa Jimbo la Arusha, Godbless Lema,aliyekuwa kwenye gari la wazi la Benanga, bila kujali mvua waliandamana kutoka ofisi za chama hicho hadi Jiji la Arusha kwa kupita barabara za Sokoine na baadaye kurejea katika ofisi za chama hicho, eneo la Ngarenaro.

Hata hivyo, ingawa maandamano hayo, yalikuwa hayana kibali, polisi walilazimika kuyasindikiza ili kuepusha vurugu kubwa na hakuna vurugu ambayo ilitokea.

Watangaza kumng’oa Meya

Akizungumza mara baada ya maandamano hayo, Mwenyekiti wa Vijana wa Chadema Mkoa wa Arusha,, Ephata Nanyaro, ambaye pia ni Diwani wa Kata ya Levolosi, alisema baada ya kupata ushindi wa Kata ya Sombetini, kazi ambayo ipo mbele yao ni kumng’oa Meya kwani wana idadi ya kutosha kuongoza jiji kwa sasa.

“Tayari tumeandaa tuhuma zake na tutapeleka jiji kuomba kikao maalum cha Baraza la Madiwani ambacho kitakuwa na ajenda moja tu juu ya utendaji wa Meya”alisema Nanyaro.

Alisema kikao hicho, kitakuwa cha wazi na akaomba wakazi wa jiji, kujitokeza wakipata taarifa kwani, tuhuma ambazo watatumia kumng’oa Meya Lymo zipo wazi .

Naye Lema akizungumza na mamia ya wakazi wa Jiji la Arusha, aliwapongeza kwa kumchagua diwani wa Chadema Kata ya Sombetni na sasa kufanya Chadema kuwa na jumla ya madiwani pamoja na wabunge 16 katika jiji la Arusha..

“Kuanzia sasa sisi ndiyo tutaongoza Jiji, tunawahakikishia tutashughulikia matatizo yenu ya ukosefu wa huduma bora za afya, barabara, viwanja, elimu na nyingine i”alisema Lema.

Alisema hivi sasa Jiji lina mpango wa kugawa viwanja na watakaonufaika ni watu kawaida walio na shida ya ardhi na siyo viongozi kama ambavyo imezoeleka kwa kuwa kamati ya mipango miji sasa itakuwa chini ya uongozi na usimamizi wa Chadema.