Qorro: Mahitaji ya Kiswahili yaongezeka

Qorro alisema kadiri siku zinavyokwenda, thamani ya lugha ya Kiswahili inaonekana kukua katika mataifa mbalimbali hivyo kuhitajika wataalamu wengi waliobobea katika lugha hiyo.

  Watanzania waliobobea kwenye taaluma ya Lugha ya Kiswahili wametakiwa kuchangamkia fursa ya kwenda kufundisha Kiswahili katika nchi mbalimbali ambazo lugha hiyo inakua kwa kasi.

Akizugumza na gazeti hili baada ya kuchaguliwa kuwa Mwenyekiti mpya wa Baraza la Kiswahili (Bakita), Profesa Martha Qorro alisema ukuaji wa Kiswahili unaenda sambamba na uibukaji wa fursa ambazo zinaweza kuwa chanzo kikubwa cha ajira.

Qorro alisema kadiri siku zinavyokwenda, thamani ya lugha ya Kiswahili inaonekana kukua katika mataifa mbalimbali hivyo kuhitajika wataalamu wengi waliobobea katika lugha hiyo.

“Tuna kila sababu ya kuchangamkia nafasi hizi kwania wanahitajika walimu na watafsiri, lakini tumejiweka nyuma matokeo yake wenzetu Wakenya wanaendelea kunufaika, na hilo linatokea kwa kuwa sisi hatuzitumii fursa hizo kama wanavyofanya wenzetu,” alisema Qorro.

Aidha, Qorro alivitaka vyombo vya habari kushirikiana na Baraza la Kiswahili ili kupunguza kasi ya upotoshaji katika matumizi ya lugha ya Kiswahili.

Alisema kuwa kwa kiasi kikubwa vyombo vya habari vimekuwa mstari wa mbele katika kupotosha matumizi sahihi ya Kiswahili kutokana na kuweka maneno yasiyo rasmi.

“Bakita imekuwa ikifanya kazi kubwa sana katika kukuza na kuendeleza lugha ya Kiswahili lakini bado vyombo vya habari vinaendelea kushiriki kwa namna moja au nyingine kuweka maneno yasiyo rasmi hali ambayo iarudisha nyuma juhudi hizi,” alisema Qorro.